Prokuroria Speciale e Kosovës ka ngritur aktakuzë ndaj 20 personave, mes tyre biznesmenit dhe politikanit serb të Kosovës, Milan Radoiçiç, për krime lufte të kryera kundër civilëve shqiptarë në Gjakovë gjatë luftës së viteve 1998-1999.
Sipas aktakuzës, të pandehurit, të cilët dyshohet se vepronin si pjesëtarë të forcave të Ministrisë së Brendshme të Serbisë, akuzohen se morën pjesë në një operacion ushtarako-policor ku u vranë 107 civilë.
Prokuroria thotë se gjatë operacionit, gratë dhe fëmijët u ndanë nga burrat. Gratë u grabitën, ndërsa burrat u ekzekutuan në shtëpitë e tyre, në oborre ose pranë urës së njohur si “Ura e Taliqit”. Pas masakrës, banesat e viktimave u plaçkitën dhe më pas u dogjën.
Për shkak se të gjithë të pandehurit ndodhen jashtë juridiksionit të Kosovës, Prokuroria ka kërkuar që procesi gjyqësor të zhvillohet në mungesë.
Në prill të vitit 2025, Gjykata Themelore në Prishtinë kishte lëshuar urdhër-arrest për Radoiçiçin dhe 19 persona të tjerë, të dyshuar për krime të kryera mes 7 dhe 10 majit 1999 në Gjakovë. Sipas hetimeve, trupat e shumë prej viktimave u gjetën pas luftës në një varrezë masive në Batajnicë të Serbisë.
Autoritetet kosovare pretendojnë gjithashtu se të dyshuarit arrestuan dhe mbajtën në mënyrë çnjerëzore rreth 300 civilë shqiptarë dhe të komuniteteve të tjera, të cilët më pas u transferuan në burgje në Kosovë dhe Serbi, për t’u liruar vetëm pas përfundimit të luftës.
Milan Radoiçiç është një emër i njohur për autoritetet e Kosovës. Ai është gjithashtu i akuzuar për organizimin e sulmit të armatosur në Banjskë në shtator të vitit 2023, ku mbeti i vrarë një efektiv i Policisë së Kosovës. Radoiçiç ka marrë përgjegjësinë për organizimin e sulmit, por ka mohuar se ka vepruar me urdhër të autoriteteve serbe.
Përveç kësaj, ai është përmendur edhe në hetime për korrupsion, si dhe është konsideruar nga autoritetet kosovare si një nga drejtuesit e grupit kriminal që dyshohet se organizoi vrasjen e politikanit serb të Kosovës, Oliver Ivanoviç, në vitin 2018. Megjithatë, për këtë çështje ai nuk është akuzuar zyrtarisht.
