Julián Álvarez i ka bërë të ditur Diego Simeones dëshirën e tij për t’u larguar nga Atlético Madrid dhe për t’iu bashkuar Barcelonës.
Sipas raportimit të gazetarit Carlos Luis Merlo, sulmuesi argjentinas synon transferimin te Barça dhe beson se Simeone është personi kyç që mund ta zhbllokojë këtë lëvizje.
Barcelona është e gatshme të investojë deri në 100 milionë euro për Álvarezin, por Atlético Madrid vazhdon të mbajë qëndrim të prerë për të ardhmen e yllit të saj. Sipas raportimeve, çështja nuk është vetëm financiare, pasi madrilenët nuk dëshirojnë ta humbin lojtarin.
Simeone gjithashtu ka deklaruar publikisht se Atlético nuk planifikon ta shesë Álvarezin gjatë kësaj vere, pavarësisht interesimit të Barcelonës dhe klubeve të tjera.
Megjithatë, situata mund të ndryshojë nëse vetë Álvarez arrin ta bindë trajnerin argjentinas për largimin e tij. Kampi i lojtarit beson se pikërisht Simeone mund të jetë çelësi për të gjetur një zgjidhje mes të gjitha palëve.
Álvarez iu bashkua Atlético Madridit në vitin 2024 nga Manchester City dhe që atëherë është shndërruar në një prej lojtarëve kryesorë të skuadrës.
Tashmë vëmendja është te qëndrimi i Simeones dhe drejtuesve të Atlético Madridit, ndërsa Barcelona vazhdon të monitorojë nga afër situatën dhe mbetet e gatshme të investojë deri në 100 milionë euro për transferimin e argjentinasit.
