Gjatë një takimi të zhvilluar me përfaqësues të diasporës kreu demokrat Sali Berisha lëshoi një alarm i fortë për situatën kritike dhe ekzistenciale në të cilën ndodhet vendi. Shifrat e prezantuara tregojnë një realitet të hidhur, ku rreth 46% e qytetarëve e kanë braktisur vendin gjatë dekadës së fundit për shkak të asaj që u cilësua si një “regjim i drogës” në Tiranë. Ndryshe nga diktaturat klasike totalitare, Kreu demokrat tha se ky sistem po përdor paratë e narkotikëve si një fuqi helmuese që po gërryen nga brenda ekonominë e ndershme dhe institucionet e shtetit. Kreu i PD gjatë fjalës së tij ka falenderuar përfaqësuesit e diasporës në SHBA për kontributin e tyre në lirinë e Shipërisë dhe në çlirimin e Kosovës.
Të dhënat, tha kreu i opozitës gjatë fjalës së tij, nënvizojnë se zhvlerësimi dramatik i euros dhe dollarit në tregun vendas nuk është produkt i një ekonomie të shëndetshme, por i pastrimit të parave të pista, një fenomen që e rendit situatën më keq se ajo e karteleve në Meksikë. Kjo situatë raportohet të ketë çuar në falimentimin e mijëra ndërmarrjeve vendase dhe në zhvlerësimin e remitencave. Sipas Berishës vendi është kthyer në “çifligun e një njeriu”, ku investimet rurale janë zhdukur, ndërsa pushteti dhe buxheti janë centralizuar në mënyrë të paprecedentë.
Në mesazhin drejtuar shqiptarëve jashtë vendit, Berisha kërkoi një mobilizim masiv për të ndalur këtë shpopullim masiv, i cili u krahasua me platformat historike për zbrazjen e trojeve shqiptare. Diaspora shihet si shpresa e fundit për të mposhtur makinerinë e propagandës, për të ndalur ndikimin e krimit të organizuar në zgjedhje dhe për t’u garantuar qytetarëve të drejtën themelore të votës së lirë. Apeli thekson rëndësinë e mbështetjes nga partnerët ndërkombëtarë për të shkëputur lidhjet e shtetit me rrjetet e transportit të kokainës dhe për të rikthyer përfundimisht shtetin ligjor.
