Himalajet mund të përballen me një tjetër goditje të fortë klimatike. Një fenomen jashtëzakonisht i fuqishëm El Niño pritet të ndikojë tek temperaturat dhe reshjet në rajon, duke rritur shqetësimin për shkrirjen e akullnajave dhe rezervat ujore të miliona njerëzve.
El Niño zakonisht arrin kulmin rreth muajit dhjetor dhe ndikimi i tij në Himalaje mund të ndihet veçanërisht gjatë verës pas kulmit. Sipas ekspertëve, një El Niño i fortë lidhet me temperatura më të larta se normalja gjatë qershorit, korrikut dhe gushtit, si dhe me një sezon më të thatë të musoneve. Kjo do të nënkuptonte më pak reshje, ndërkohë që temperaturat më të larta do të përshpejtonin shkrirjen e akullit.
Pasojat mund të jenë të rëndësishme për akullnajat, të cilat tashmë po humbasin masë si pasojë e ngrohjes globale. Shkrirja e tyre jo vetëm pakëson rezervat afatgjata të ujit, por mund të destabilizojë edhe shpatet malore dhe akullnajat, duke rritur rrezikun e përmbytjeve dhe rrëshqitjeve të dheut.
Situata bëhet edhe më e ndërlikuar nëse El Niño do të pasohet nga La Niña. Ky ndryshim mund të sjellë më shumë reshje në Himalaje, duke shtuar presionin mbi akullnajat dhe shpatet që janë dobësuar nga shkrirja e akullit.
Megjithatë, shkencëtarët paralajmërojnë se ndikimi i El Niños në Himalaje është më i vështirë për t’u parashikuar sesa në shumë rajone të tjera të botës. Rrymat e erës, ndikimi i Oqeanit Indian dhe mikroklimat e shumta të zonës mund të ndryshojnë ndjeshëm pasojat.
Himalajet konsiderohen “poli i tretë” i Tokës, për shkak të rezervave gjigante të akullit jashtë rajoneve polare. Rajoni po ngrohet më shpejt se mesatarja globale, ndërsa akullnajat po humbasin akull me ritme shumë më të larta se në fillim të viteve 2000.
Shkencëtarët nuk kanë ende prova të mjaftueshme për të lidhur drejtpërdrejt El Niñon me katastrofën e fundit në Nepal dhe Tibet. Megjithatë, ngrohja e pazakontë e gushtit mund të ketë ndikuar në shkrirjen e borës dhe akullit dhe në destabilizimin e terrenit.
Me një El Niño që mund të jetë ndër më të fuqishmit e dekadave të fundit, Himalajet hyjnë kështu në një periudhë ku ndryshimet e temperaturave dhe reshjeve mund të kenë pasoja të mëdha për akullnajat, ujin dhe sigurinë e komuniteteve që jetojnë në këtë rajon.
