Ministri i Mbrojtjes Ermal Nufi, pasi i shpërtheu skandali i trafikut të armëve dhe abuzimit me fondet publike në favor te mikut të kreut të qeverisë Ron Yeffet është munduar që nëpërmjet një postimi në rrjetet sociale tu hedhë hi syve atyre që tashmë i kanë kuptuar faktet dhe të vërtetën e kësaj afere.
KAYO, kompania shtetërore është aksionere me 20 % në Timac Defence, çka tregon falimentimin e shtetit në këtë aferë dhe vënien në shërbim të ortakut të Ramës.
Nuk kanë fare cipë dhe në këtë mënyrë bëhen krejt qesharakë. Ndërkohë që më herët kishte deklaruar në Kuvend se armët e prodhuara në Shqipëri janë tashmë në zona konflikti, ai del në rrjetet sociale, normal i detyruar edhe nga shefi i tij që është edhe shefi i aferës dhe mundohet të shpjegojë se qeveria e ku bën pjesë po investon që të zhvillojë industrinë e mbrojtjes. Poston edhe një video për të krijuar imazhin e një pune “kolosale” ndërkohë që nuk dha asnjë shpjegim për akuzat e qarta të publikuara nga Arben Ahmetaj ish zëvendës kryeministri i Shqipërisë.
Postimi i Ministrit Nufi
Zhvillimi i industrisë së mbrojtjes mbetet sot një prioritet në Republikën e Shqipërisë 🇦🇱, i cili është në funksion të sigurisë kombëtare dhe angazhimeve që kemi si vend anëtar i NATO-s. Nëse për shumë vite me radhë kjo industri u trajtua si një trashëgimi “për t’u shkatërruar”, ne sot po e ndërtojmë dhe fuqizojmë atë me kapacitete drejt së ardhmes duke prodhuar siguri, teknologji, kapacitete, si dhe duke gjeneruar punësim për qytetarët e vendit.
