Një nga serialet më të njohura të Netflix, “Lupin”, po rikthehet me sezonin e katërt. Episodet e reja do të publikohen më 23 tetor, ndërsa traileri i parë ka zbuluar disa detaje nga aventura e radhës së Assane Diop.
“Kemi një Lupin të ri”, thuhet në nisje të trailerit, ku personazhi kryesor shfaqet i bllokuar në kafaze qelqi, ndërsa një tjetër mjeshtër i mashtrimit është i lirë dhe policia është vënë në gjurmët e tij.
Assane do të vazhdojë të përdorë maska dhe identitete të ndryshme, duke krijuar konfuzion për ata që përpiqen ta kapin.
Sezoni i katërt zhvillohet katër vjet pas ngjarjeve të sezonit të kaluar. Assane dëshiron të vuajë dënimin dhe të përmbushë një premtim që i ka bërë të birit, duke udhëtuar drejt Senegalit për t’iu bashkuar pjesës tjetër të familjes.
Megjithatë, planet e tij ndryshojnë papritur pas një njoftimi misterioz, të nënshkruar në emër të Lupin, ku bëhet fjalë për grabitje të njëkohshme në disa muze.
Në rolin kryesor rikthehet aktori Omar Sy, i cili e ka interpretuar Assane Diop që prej nisjes së serialit. “Lupin” është shndërruar në një nga serialet më të suksesshme joanglisht të Netflix.
Në kastin e sezonit të katërt janë gjithashtu Ludivine Sagnier, Antoine Gouy, Soufiane Guerrab, Shirine Boutella, Theo Christine dhe Laïka Blanc-Francard.
Seriali është shkruar nga George Kay, në bashkëpunim me François Uzan, ndërsa episodet e reja janë drejtuar nga Edouard Salier, Everardo Gout dhe Hugo Gelin. Prodhimi është realizuar nga Gaumont.
“Lupin” është frymëzuar nga personazhi i hajdutit të famshëm Arsène Lupin, krijuar nga shkrimtari francez Maurice Leblanc.
