Kompania hungareze me kosto të ulët “Wizz Air” po shqyrton mundësinë e shtimit të pesë deri në gjashtë avionëve të tjerë në flotën e saj të stacionuar në Tiranë gjatë katër viteve të ardhshme, pasi pret një rritje të përshpejtuar të numrit të pasagjerëve.
“Ne do të shqyrtonim mundësinë e sjelljes së pesë deri në gjashtë avionëve të tjerë, përveç 14-15 që kemi aktualisht. Kështu, ne mbetemi në një trajektore rritjeje sa i përket pranisë sonë në Shqipëri,” deklaroi shefi ekzekutiv i “Wizz Air”, Jozsef Varadi për “Business Mag”
Kompania po shqyrton gjithashtu mundësinë e krijimit të infrastrukturës së specializuar për të ofruar shërbime mirëmbajtjeje për një flotë më të madhe.
“Ne duam të kemi sa më shumë të jetë e mundur edhe pilotë vendas. Do të ishim shumë të interesuar që shqiptarët të përfshiheshin në këtë profesion dhe ne t’i trajnonim ata. Pra, trajnimi i pilotëve është një nga fushat ku do të vazhdojmë të investojmë,” shtoi Varadi.
“Wizz Air”, e cila e nisi aktivitetin në aeroportin e Tiranës në vitin 2017, hapi bazën e saj në Aeroportin Ndërkombëtar të Tiranës në vitin 2020, me një flotë fillestare prej tre avionësh.
“Wizz Air” realizoi rreth 54% të trafikut total të Aeroportit Ndërkombëtar të Tiranës në vitin 2025 – trafik që arriti në 11,6 milionë pasagjerë – sipas të dhënave nga TIA.
