Rita Hayworth ishte një nga ikonat më të mëdha të Hollivudit të vjetër, e njohur për bukurinë, talentin në vallëzim dhe rolet që e bënë të pavdekshme në historinë e kinemasë. Por pas imazhit të shkëlqyer të “perëndeshës së dashurisë” fshihej një jetë e mbushur me trauma, martesa të dështuara dhe një betejë të dhimbshme me sëmundjen e Alzheimerit. E lindur më 17 tetor 1918 në Nju Jork, me emrin Margarita Carmen Cancino, ajo u rrit në një familje artistësh dhe nisi të kërcente që në moshë të vogël. Sipas biografive të saj, fëmijëria u shoqërua me përvoja traumatike, ndërsa rruga drejt famës kërkoi edhe ndryshimin e emrit dhe të pamjes së saj.
Suksesi ndërkombëtar erdhi në vitet 1940, ndërsa filmi “Gilda”, i vitit 1946, e shndërroi në një ikonë të kinemasë. Skena ku ajo interpreton këngën “Put the Blame on Mame”, duke hequr ngadalë një dorezë të zezë, mbetet ndër momentet më të njohura të karrierës së saj.
Megjithatë, fama nuk i solli lumturinë personale. Hayworth u martua pesë herë, mes të tjerëve me aktorin dhe regjisorin Orson Welles dhe princin Ali Khan, me të cilin pati vajzën Yasmin. Pavarësisht famës dhe vëmendjes së vazhdueshme, ajo pati vështirësi të gjente stabilitet në jetën private. Nga vitet 1960, aktorja nisi të përjetonte probleme me kujtesën dhe përqendrimin, të cilat për një kohë u lidhën me konsumimin e alkoolit. Në vitin 1972, ajo realizoi filmin e saj të fundit, ndërsa në vitin 1980 u diagnostikua me sëmundjen e Alzheimerit.
Në vitet e fundit të jetës, gjendja e saj u përkeqësua dhe ajo humbi gradualisht aftësinë për të jetuar e pavarur dhe për të njohur njerëzit përreth. Vajza e saj, Yasmin Aga Khan, u kujdes për të dhe u angazhua për ndërgjegjësimin e publikut mbi Alzheimerin, duke mbështetur edhe nisma për mbledhjen e fondeve për kërkimin shkencor. Rita Hayworth ndërroi jetë më 14 maj 1987, në moshën 68-vjeçare. Ajo la pas një trashëgimi të rëndësishme artistike dhe një histori personale që tregoi kontrastin mes shkëlqimit të Hollivudit dhe vuajtjeve që mund të fshihen pas famës.
Edhe sot, emri i saj mbetet i lidhur me epokën e artë të kinemasë, ndërsa historia e saj kujtohet jo vetëm për rolet legjendare, por edhe për betejën me një sëmundje që i mori gradualisht kujtimet.
