Pas 55 vjetësh, agjencia Parks Canada po mbyll programin e saj të qenve të kërkimit në malet shkëmbore kanadeze. Vendimi për të eliminuar të vetmen skuadër të mbetur, e cila vepronte në Parkun Kombëtar Banff, është marrë si pjesë e shkurtimeve më të gjera buxhetore të qeverisë dhe ka shkaktuar një reagim të fortë publik, raporton BBC.
Scott Ward, i cili ka punuar 17 vjet si trajner qensh në zonat e egra të maleve shkëmbore, kujton operacione të shumta të suksesshme. Në një rast, qeni i tij gjeti fëmijë të humbur në pyjet e dendura të Parkut Kombëtar Banff. Në një rast tjetër, qeni e çoi atë për dy orë lart në një mal të thiktë, te një burrë me këmbë të thyer, i cili ishte në prag të ngrirjes për vdekje.
Tashmë 73-vjeç dhe në pension, Ward u trondit kur mësoi se Parks Canada po e shfuqizon plotësisht programin.
“Kemi humbur një burim jashtëzakonisht të vlefshëm për sigurinë e publikut, por edhe të personelit,” tha Ward.
Parks Canada konfirmoi se eliminimi i pozicionit të vetëm të trajnerit të qenve në Parkun Kombëtar Banff ishte një “vendim i vështirë”.
Parku, i cili ndodhet në një nga zonat më sfiduese të Kanadasë, vizitohet çdo vit nga më shumë se katër milionë njerëz. Shpjegimi zyrtar thotë se masa është pjesë e modernizimit të departamentit të zbatimit të ligjit dhe se “operacionet e kërkim-shpëtimit do të vazhdojnë të kryhen” duke përdorur metoda të tjera.
Vendimi ka shkaktuar zemërim, ndërsa një peticion për ruajtjen e programit, i nisur të martën, është nënshkruar nga më shumë se 5 000 persona. William Stevenson, deputet konservator për Banff-in dhe nismëtar i peticionit, thotë se e mbështet kontrollin e shpenzimeve qeveritare, por beson se ky shkurtim specifik mund të rrezikojë sigurinë publike.
Qeni i fundit i shërbimit në këtë program, një qen bari gjerman i quajtur Leroy, doli në pension në muajin gusht. Vende të tjera, si Italia, vazhdojnë t’i përdorin qentë në operacionet e shpëtimit në male.
