Serbia po shqyrton një plan ambicioz për forcimin dhe modernizimin e Forcave të Armatosura, i cili parashikon rritjen graduale të buxhetit të mbrojtjes deri në 5% të Prodhimit të Brendshëm Bruto (PBB), krijimin e një sistemi strategjik të mbrojtjes kundërajrore dhe rritjen e pagave për personelin ushtarak me 20 deri në 30%.
Plani i ri i armatimit dhe riorganizimit të ushtrisë serbe u prezantua nga Luka Ponorac, përfaqësues i koalicionit “Lista Studentore” për çështjet ushtarake, gjatë një interviste për televizionin publik serb RTS.
Ai theksoi se zbatimi i këtij programi do të varet nga gjendja reale financiare që do të trashëgojë qeveria e re e vendit.
Sipas projektit, i hartuar nga ekspertë të njohur serbë, shpenzimet ushtarake do të rriten gradualisht nga niveli aktual prej 2-2.5% të PBB-së, fillimisht në 3% dhe më pas, në një fazë afatgjatë, në 5%. Synimi është që Serbia të përshtatë kapacitetet e saj ushtarake me zhvillimet dhe standardet e sigurisë në rajon.
Rritje pagash deri në 30% për ushtarakët
Një tjetër element i rëndësishëm i planit është rritja e pagave për të gjithë personelin e Forcave të Armatosura me 20 deri në 30%.
Parashikohet gjithashtu korrigjimi i pabarazive ekzistuese në sistemin e pagave, ku, për shkak të shtesave dhe bonuseve, në disa raste ushtarë me grada të ulëta në njësitë speciale përfitojnë paga më të larta se gjeneralët apo profesorët e Akademisë Ushtarake.
“Kupolë” kundërajrore dhe sisteme të reja raketore
Modernizimi i armatimit dhe pajisjeve ushtarake do të jetë një nga prioritetet kryesore të programit.
Plani parashikon blerjen e sistemeve raketore me rreze veprimi nga 150 deri në 300 kilometra, si dhe krijimin e një sistemi strategjik të mbrojtjes ajrore, të konceptuar si një “kupolë” me tri nivele: rreze të shkurtër, të mesme dhe të gjatë.
Në kuadër të këtij programi synohet gjithashtu:
Krijimi i një sistemi të integruar të komandimit, komunikimit dhe kontrollit, me shkëmbim të sigurt të informacionit.
Pajisja me sisteme të mbikëqyrjes ajrore dhe paralajmërimit të hershëm.
Blerja e dronëve dhe sistemeve të tjera pa pilot.
Përmirësimi i kapaciteteve teknologjike dhe ushtarake të vendit.
“Kjo është një procedurë që do të përfshijë disa drejtime, përfshirë blerjen e sistemeve raketore me rreze veprimi 150 deri në 300 kilometra dhe krijimin e një kupole strategjike të mbrojtjes ajrore me tri nivele”, deklaroi Ponorac për RTS.
Riorganizim i strukturave ushtarake dhe shërbimeve të inteligjencës
Programi parashikon edhe forcimin e rolit të Institutit Teknik Ushtarak (VTI) dhe Qendrës Teknologjike për Testimin e Armëve (TOC), me synimin për të rritur kapacitetet vendase në kërkim, zhvillim dhe testim të teknologjive ushtarake.
Një tjetër objektiv është krijimi i mundësive për një karrierë profesionale më të qëndrueshme dhe të parashikueshme për pjesëtarët e Forcave të Armatosura.
Sa i përket shërbimeve ushtarake të sigurisë dhe inteligjencës, “Lista Studentore” premton rikthimin e rreptë të veprimtarisë së tyre brenda kufijve të përcaktuar me ligj, si dhe hetimin e përgjegjësive individuale për çdo veprim të mundshëm të paligjshëm në të kaluarën.
Megjithatë, realizimi i të gjitha këtyre objektivave mbetet i kushtëzuar nga gjendja financiare që do të konstatohet pas marrjes së pushtetit nga qeveria e re.
