Kapiteni i Anglisë, Harry Kane, ka marrë një dhuratë të veçantë nga Luka Modriç para ndeshjes ndërmjet Anglisë dhe Kroacisë, e cila përfundoi me fitoren 2:1 të anglezëve në kuadër të Ligës së Kombeve.
Pas ndeshjes në “Wembley”, Kane foli për paraqitjen e Kroacisë, golin e tij nga penalltia dhe dhuratën që mori nga kapiteni kroat.
“E prisnim reagimin e Kroacisë. Mendoj se ishte një ndeshje mjaft e barabartë.
Kroacia arriti të rikthehej në lojë pas epërsisë sonë dhe na e vështirësoi shumë punën, sidomos në 15 minutat e fundit.
E dinim se na priste një sfidë e vështirë dhe për këtë arsye ishte shumë e rëndësishme të fitonim”, deklaroi Kane për televizionin “Nova TV”.
Kane: Nuk e dija çfarë përfaqësonte dhurata e Modriçit
Sulmuesi anglez foli edhe për golin e realizuar nga pika e bardhë në minutën e 64-t, që i siguroi Anglisë fitoren.
“Është ndjenjë e bukur të shënosh nga penalltia. Ishte veçanërisht e rëndësishme për mua të realizoja gol në një ndeshje para së cilës prezantova Topin e Artë. Jam i lumtur që ndihmova skuadrën të fitonte. Gjithashtu, dua ta falënderoj Kroacinë për topin që ma dhuroi”, u shpreh Kane.
Para fillimit të ndeshjes, Luka Modriç i kishte dhuruar kapitenit anglez një kopje të topit të parë të futbollit që kishte mbërritur në Kroaci. Bëhet fjalë për topin që anglezët e kishin sjellë në vitin 1880 në qytetin e Zhupanjës.
Kjo dhuratë iu bë Kane në shenjë respekti për rekordin e tij historik, pasi në këtë ndeshje regjistroi paraqitjen e 126-të me Anglinë, duke kaluar Peter Shiltonin.
Megjithatë, Kane pranoi se në momentin e pranimit të dhuratës nuk e dinte rëndësinë historike të saj.
“Sinqerisht, nuk e dija se për çfarë bëhej fjalë. Desha ta pyesja Modriçin se çfarë përfaqësonte ajo dhuratë. Ju falënderoj që ma shpjeguat tani këtë informacion. Ky gjest do të thotë shumë për mua dhe e vlerësoj jashtëzakonisht shumë. Faleminderit!”, deklaroi kapiteni anglez.
