Ballina Kosovë “E turpshme dhe e papranueshme”, Çitaku reagon pas vendimit të Speciales ndaj...

“E turpshme dhe e papranueshme”, Çitaku reagon pas vendimit të Speciales ndaj Thaçit dhe të tjerëve

32
0

Ushtruesja e detyrës së kryetares së Partisë Demokratike të Kosovës (PDK), Vlora Çitaku, ka reaguar pas vendimit të sotëm të Gjykatës Speciale në Hagë ndaj ish-presidentit Hashim Thaçi dhe të tjerëve, në procesin për pengim të drejtësisë.

Çitaku e ka cilësuar vendimin si të turpshëm dhe të papranueshëm, duke shprehur zhgënjim dhe shqetësim për cenimin e besimit në paanshmërinë e kësaj Gjykate. Ajo ka kritikuar kontestimet procedurale, proceset e njëpasnjëshme dhe zvarritjet shumëvjeçare, ndërsa ka bërë thirrje për qëndresë dhe mobilizim politik, juridik e diplomatik në mbrojtje të luftës çlirimtare të Kosovës.

Reagimi i plotë

E turpshme! E papranueshme!

Nuk ka asgjë më shqetësuese për drejtësinë sesa kur vendimet e saj pushojnë së befasuari, sepse besimi në paanshmërinë e saj është cenuar thellë.

Shpreh zhgënjimin dhe shqetësimin tim të thellë për vendimin e sotëm të Gjykatës Speciale në Hagë ndaj Presidentit Hashim Thaçi dhe të tjerëve, në procesin për pengim të drejtësisë.

Kontestimet procedurale, proceset e njëpasnjëshme dhe zvarritjet shumëvjeçare i kanë thelluar pikëpyetjet tona serioze për administrimin e drejtësisë të kësaj Gjykate.

Drejtësia nuk mund të ketë dy standarde: një për ata që gjykohen dhe një tjetër për ata që gjykojnë.

Padrejtësisë do t’i përgjigjemi ashtu siç e meriton: me qëndresë, mobilizim dhe përkushtim të palëkundur shtetëror e mbarëkombëtar. Me veprime konkrete politike, juridike e diplomatike. Me vendosmëri, deri në fund!

Lufta jonë për liri ishte e drejtë. UÇK ishte ushtria jonë çlirimtare. Sakrifica e një populli për çlirim është pjesë e pandryshueshme e historisë sonë dhe nuk mund të njolloset – asnjëherë. Me çlirimtarët, deri në liri!