Ballina Europë ITALI/ 72 orë pa drita dhe internet nga 17 nëntori? E vërteta...

ITALI/ 72 orë pa drita dhe internet nga 17 nëntori? E vërteta pas lajmit që po përhap panik në rrjet

26
0

Një ndërprerje globale e energjisë elektrike, internetit dhe komunikimeve për 72 orë, duke nisur nga 17 nëntori 2026. Ky është paralajmërimi që po qarkullon me shpejtësi në rrjetet sociale, duke shkaktuar shqetësim te qytetarët në Itali dhe vende të tjera të botës.

Sipas televizionit italian Sky TG24, bëhet fjalë për një lajm të rremë, që është përhapur përmes videove dhe mesazheve virale. Asnjë qeveri apo autoritet kompetent nuk ka njoftuar një ndërprerje të planifikuar të energjisë elektrike, internetit apo komunikimeve në një shkallë të tillë.

Dezinformimi ka lindur nga bashkimi i disa informacioneve reale, por që nuk kanë lidhje me njëra-tjetrën. Një prej tyre është një test i sistemit amerikan të alarmit, i njoftuar nga Komisioni Federal i Komunikimeve (FCC) në Shtetet e Bashkuara.

Sipas informacionit të publikuar nga Sky TG24, testimi është parashikuar për 17 nëntor dhe konsiston në ndërprerjen për rreth një minutë të transmetimeve radiofonike dhe televizive në SHBA, të cilat do të zëvendësohen nga një mesazh emergjence. Ky test nuk ka lidhje me ndërprerjen e energjisë elektrike apo internetit dhe aq më pak me një blackout botëror.

Në përhapjen e pretendimeve kanë ndikuar edhe lajmet për sulmet e fundit kibernetike, të cilat janë përdorur për të krijuar përshtypjen se një kolaps i sistemeve të komunikimit është i pashmangshëm.

Si në shumë raste të tjera dezinformimi, në këtë histori është përfshirë edhe seriali i famshëm amerikan “The Simpsons”. Në rrjetet sociale pretendohet se një episod i serialit kishte parashikuar ndërprerjen globale të energjisë elektrike më 17 nëntor. Megjithatë, ky pretendim nuk përbën provë për një ngjarje të tillë.