Një skulpturë hiperrealiste e presidentit amerikan Donald Trump, e paraqitur i lidhur në një kryq dhe me uniformë portokalli burgu, ka ndezur debat në Zvicër.
Vepra, e titulluar “Saint or Sinner” (Shenjt apo Mëkatar), është krijuar nga artisti britanik Mason Storm dhe po ekspozohet në qytetin e Bazelit. Ajo paraqet Trump në një pozicion që kujton figurën biblike të Krishtit, një zgjedhje artistike që shumë e kanë quajtur provokuese dhe blasfemuese.
Storm, i cili njihet për stilin e tij realist dhe për përpjekjet për të ruajtur anonimatin – ngjashëm me artistin Banksy – tha se vepra synon të nxisë reflektim mbi perceptimin publik të figurave politike.
Një vizitore nga Norvegjia komentoi për mediat lokale:
“Fakti që një vepër e tillë mund të ekspozohet tregon se jetojmë në një demokraci. Në SHBA, diçka e tillë ndoshta do të ndalohej.”
Ndërsa pronari i galerisë u shpreh:
“Sinqerisht mendoj se Trump mund ta shohë veten si një Jezus modern. Ai është i bindur se po vepron me mirëbesim.”
Skulptura, e cila më parë ishte ekspozuar në Vjenë, është tashmë blerë nga një koleksionist privat që ka zgjedhur të mbetet anonim.
Ekspozita e Bazelit po tërheq turma vizitorësh dhe po ndez debat mbi kufijtë midis artit, politikës dhe simbolikës fetare.
