Kryeministri i Australisë, Anthony Albanese, është martuar këtë të shtunë me partneren e tij, Jodie Haydon, në një ceremoni intime të mbajtur në rezidencën zyrtare të kryeministrit, “The Lodge”, në Canberra. Me këtë martesë, Albanese bëhet udhëheqësi i parë australian që lidh kurorë gjatë kohës që është në detyrë.
Ceremonia u zhvillua në një rreth të ngushtë familjarësh dhe miqsh të afërt. Në mesin e të pranishmëve ishin djali i kryeministrit, Nathan, dhe prindërit e nuses, Bill dhe Pauline Haydon. Çifti shkëmbeu betimet e shkruara vetë, ndërsa Haydon u shoqërua drejt altarit nga prindërit e saj, nën tingujt e këngës “The Luckiest” të Ben Folds.
Jodie Haydon zgjodhi një fustan të dizajnuar nga shtëpia australiane e modës Romance Was Born, ndërsa kostumi i kryeministrit ishte nga marka MJ Bale. Unazat e çiftit janë punuar nga argjendarët Cerrone në Sydney.
“Jemi absolutisht të kënaqur që ndajmë dashurinë dhe angazhimin tonë për të kaluar jetën tonë së bashku, përpara familjes dhe miqve tanë më të ngushtë”, tha Albanese në një deklaratë të shkurtër.
Çifti u fejua në Ditën e Shën Valentinit, vitin e kaluar. Propozimi i udhëheqësit të Partisë Laburiste dhe pritja e dasmës u zhvilluan në rezidencën e tij zyrtare, The Lodge.
Deri në ditën e madhe, planet e dasmës ishin mbajtur sekret për shkak të shqetësimeve në lidhje me sigurinë.
Pas nënshkrimit të aktit të martesës, çifti doli nga ceremonia nën tingujt e këngës së Stevie Wonder “Signed, Sealed, Delivered (I’m Yours)”, ndërsa vallja e parë u realizua me “The Way You Look Tonight” të Frank Sinatrës.
Në mesin e të ftuarve ishin figura të rëndësishme të kabinetit australian, përfshirë ministrin e financave Jim Chalmers me bashkëshorten, ministren e jashtme Penny Wong dhe ministren e financave Katy Gallagher. I pranishëm ishte edhe shefi i kabinetit të kryeministrit, Tim Gartrell.
Kostoja e dasmës është mbuluar privatisht nga çifti, ndërsa muaji i mjaltit do të zhvillohet brenda Australisë. Ngjarja vjen vetëm një ditë pas përfundimit të sesionit të fundit parlamentar për vitin 2025 dhe gjashtë muaj pas rizgjedhjes së Albanese me një rezultat të thellë.
Anthony Albanese dhe Jodie Haydon u njohën në vitin 2019 gjatë një aktiviteti publik në Melbourne, pasi Haydon i kishte bërë thirrje nga salla kryeministrit të ardhshëm: “Up the Rabbitohs”, në mbështetje të ekipit të tij të zemrës në rugby. Lidhja e tyre u forcua menjëherë pas kontaktit të parë dhe në shkurt 2024, Albanese kërkoi zyrtarisht dorën e Haydonit në Ditën e Shën Valentinit, me një unazë të dizajnuar posaçërisht.
Kjo është martesa e dytë për kryeministrin, i cili u nda nga bashkëshortja e tij e parë, ish-deputetja Carmel Tebbutt, në vitin 2019.
