Një valë e ashpër moti dimëror ka përfshirë Shtetet e Bashkuara, duke vënë në gatishmëri rreth 40 shtete dhe duke prekur potencialisht deri në 150 milionë njerëz deri të dielën, sipas parashikimeve meteorologjike. Temperaturat ekstreme kanë zbritur në nivele rekord, me -23 gradë Celsius në Nju Jork dhe deri në -46°C në Rrafshnaltat Veriore të vendit.
Reshje të dendura dëbore janë regjistruar në Teksasin veriperëndimor dhe në Oklahomë, ku rreth 24 mijë familje kanë mbetur pa energji elektrike për shkak të kushteve të rënda atmosferike. Në Çikago, temperaturat ranë në -27°C, duke shtuar shqetësimet për sigurinë dhe shëndetin e banorëve.
Të paktën 12 shtete kanë shpallur gjendje të jashtëzakonshme me vendim të guvernatorëve, përfshirë Arkansasin, Xhorxhian, Teksasin, Karolinën e Veriut dhe Karolinën e Jugut. Në disa zona, Garda Kombëtare është vënë në gatishmëri për të ndihmuar autoritetet lokale në përballimin e emergjencës. Moti ekstrem ka shkaktuar gjithashtu kaos në transportin ajror. Mbi 10 mijë fluturime janë anuluar në të gjithë vendin, ndërsa Aeroporti Ndërkombëtar Dallas–Fort Worth, një nga më të ngarkuarit në SHBA, është ndër më të prekurit, me më shumë se 1,200 fluturime të anuluara për në dhe nga fundjava.
Guvernatorja e Nju Jorkut, Kathy Hochul, njoftoi se shteti ka mobilizuar mbi 1,600 borëpastruese dhe 114 mijë ton kripë për të përballuar stuhinë. Ajo paralajmëroi se “nuk do të ketë asnjë cep të shtetit që të mos preket nga zemërimi i Nënës Natyrë”. Sipas Jacob Asherman, meteorolog në Qendrën e Parashikimit të Motit të Shërbimit Kombëtar të Motit, nëse përfshihet edhe efekti i të ftohtit ekstrem, numri i përgjithshëm i njerëzve të prekur mund të arrijë deri në 220 milionë.
“Kjo është një stuhi që do të mbahet mend për vite me radhë,” deklaroi të premten Caitlin Dirks, meteorologe në Shërbimin Kombëtar të Motit, duke e cilësuar fenomenin si historik për shkak të shtresave të gjera të akullit që pritet të shkaktojnë dëme serioze në infrastrukturë. Intensiteti i motit të keq pasqyrohet edhe në pamjet nga shumë qytete, ku qytetarë të shumtë janë parë në radhë jashtë dyqaneve për të siguruar furnizime bazë, ndërsa raftet po zbrazen me shpejtësi.
