Zëvendëspresidenti i SHBA-së, J.D. Vance, do të vizitojë Hungarinë sot, vetëm pak ditë përpara zgjedhjeve parlamentare, në një moment kritik për kryeministrin Viktor Orbán.
Sipas sondazheve të fundit, Orbán rrezikon të humbasë pushtetin ndaj partisë së qendrës së djathtë Tisza, e udhëhequr nga Péter Magyar.
Gjatë vizitës, Vance pritet të marrë pjesë në një tubim elektoral në Budapest, ku do të dalë në krah të Orbán në një qendër sportive, duke treguar mbështetjen e hapur të administratës amerikane. Ai gjithashtu do të zhvillojë një takim dypalësh me kryeministrin hungarez dhe një konferencë të përbashkët për shtyp.
Sipas Shtëpisë së Bardhë, fjalimi i Vance do të fokusohet në forcimin e marrëdhënieve mes SHBA-së dhe Hungarisë, duke theksuar partneritetin strategjik mes dy vendeve.
Orbán, i cili ka qenë në pushtet që nga viti 2010 dhe më herët ka drejtuar vendin edhe në periudhën 1998–2002, përballet me një nga sfidat më të forta politike në karrierën e tij. Kryeministri hungarez njihet për qëndrimet e tij populiste të djathta dhe për marrëdhëniet e afërta si me administratën e Donald Trump, ashtu edhe me presidentin rus Vladimir Putin.
