Daniel Kinahan, një nga figurat kryesore të krimit të organizuar ndërkombëtar, është arrestuar në Dubai në bazë të një urdhër-arresti të lëshuar nga autoritetet irlandeze.
Sipas raportimeve të RTÉ, Kinahan, rreth të 40-ave, u ndalua më 15 prill pas një operacioni të gjerë kërkimi dhe mbikëqyrjeje nga policia e Dubait. Autoritetet e Emirateve të Bashkuara Arabe konfirmuan arrestimin e një shtetasi irlandez të kërkuar për përfshirje në një rrjet ndërkombëtar të krimit të organizuar.
Sipas burimeve zyrtare, arrestimi u bë i mundur pas dorëzimit të një dosjeje nga autoritetet irlandeze, ku përshkruheshin akuzat dhe aktiviteti i dyshuar kriminal i Kinahan. Në bazë të kësaj dosjeje, Prokuroria Publike e Dubait lëshoi urdhrin e arrestit dhe nisi procedurat për ekstradimin e tij.
Ai u kap brenda 48 orëve nga lëshimi i urdhrit, ndërsa autoritetet theksojnë se operacioni është zhvilluar në përputhje me marrëveshjen dypalëshe të ekstradimit mes dy vendeve.
Në një deklaratë, An Garda Síochána e cilësoi arrestimin si një shembull të rëndësishëm të bashkëpunimit ndërkombëtar në luftën kundër krimit të organizuar.
“Ky është një demonstrim i qartë i nevojës për bashkëpunim të ngushtë mes agjencive ligjzbatuese për të goditur rrjetet kriminale ndërkombëtare”, thuhet në reagimin zyrtar.
Çështja aktualisht mbetet në juridiksionin e autoriteteve të Emirateve të Bashkuara Arabe, ndërsa pritet vijimi i procedurave ligjore për ekstradimin e tij drejt Irlandës.
