Këngëtarja botërore Shakira ka tërhequr vëmendje në rrjetet sociale pasi ka ndarë një postim në Instagram menjëherë pas fitores së saj në një çështje të gjatë ligjore kundër autoriteteve tatimore spanjolle.
Ajo u shfaq e buzëqeshur dhe në një moment celebrimi, duke e shoqëruar postimin me këngën ikonike të Rihanna-s “Bitch Better Have My Money”, një zgjedhje që shumë fansa e interpretuan si simbolike pas vendimit të gjykatës, shkruan Daily mail.
Gjykata në Spanjë vendosi në favor të saj, duke rrëzuar një gjobë prej rreth 55 milionë eurosh dhe duke urdhëruar shtetin spanjoll t’i kthejë më shumë se 60 milionë euro me interesa, pasi nuk u provua që ajo ishte rezidente tatimore në vitin 2011.
Vendimi u konsiderua si një fitore e rëndësishme ligjore për këngëtaren, e cila për vite me radhë ishte nën hetime dhe presion mediatik për çështjen e taksave në Spanjë.
Sipas gjykatës, autoritetet nuk arritën të dëshmonin që Shakira kishte kaluar mjaftueshëm kohë në Spanjë për t’u konsideruar rezidente tatimore në atë periudhë.
Postimi i saj në rrjetet sociale u interpretua nga fansat si një moment triumfi dhe lehtësimi pas një beteje të gjatë ligjore që zgjati për vite me radhë.
Shakira ka qenë më parë e përfshirë edhe në çështje të tjera tatimore në Spanjë, të cilat i ka zgjidhur përmes marrëveshjeve dhe pagesave me autoritetet.
