Mesfushori i Aston Villa, Morgan Rogers, është shpallur “Lojtari i Sezonit” në Europa League, pas udhëheqjes së skuadrës angleze drejt triumfit në finale ndaj Freiburg.
UEFA e ka dhënë çmimin të enjten, vetëm një ditë pasi Aston Villa ka fituar 3:0 në finalen e zhvilluar në Stamboll, duke i dhënë fund pritjes tridhjetëvjeçare për një trofe të madh.
Njëzet e tre vjeçari anglez ka shkëlqyer në finalen ndaj Freiburg, ku ka shënuar golin e tretë dhe ka kontribuar edhe me një asistim.
Rogers ka qenë një nga lojtarët kryesorë të Villa gjatë gjithë rrugëtimit në Europa League. Ai ka realizuar gola edhe ndaj Red Bull Salzburg dhe Bologna, ndërsa e ka mbyllur sezonin evropian me pesë asistime.
Ndërkohë, sulmuesi i Freiburgut, Johan Manzambi, është shpallur “Zbulimi i Sezonit” në Europa League. Njëzetvjeçari zviceran ka luajtur në të gjitha pesëmbëdhjetë ndeshjet e skuadrës gjermane në këtë edicion, duke shënuar dy gola dhe duke dhënë dy asistime.
Njëri prej golave më të rëndësishëm ka qenë në gjysmëfinale ndaj Braga, që i ka siguruar Freiburg kualifikimin në finale.
