Aktivisti, Gentian Serjani i ftuar këtë të diele në një studio televizive ka folur lidhur me udhëzimin nga Ministria e Shëndetësisë dhe Mbrojtjes Sociale lidhur me terapinë hormonale për personat transgjinorë. Ai theksoi se ky udhëzim ka ardhur lidhur me rrugëtimin e Shqipërisë në BE.
Serjani theksoi se në raportet e BE, Shqipëria gjithmonë ka shkelje lidhur me respektimin e të drejtave të këtij komuniteti. Sipas tij, Shqipëria do të jetë një nxënës i mirë për t’u bërë pjesë e BE-së.
“Në fakt Greta, unë do doja që të sillja pak kontekstin pse është miratuar ky urdhër apo ai udhëzim nga Ministria e Shëndetësisë dhe Mbrojtjes Sociale. Së pari, ne e dimë që në vitin 2025 slogani kryesor i partisë në pushtet apo i qeverisë, ishte Bashkimi Europian. Dhe në kuadër të kësaj ne dimë që u hapën negociatat. Një nga kapitujt kryesorë të negociatave ka të bëjë me të drejtat e njeriut.
Një nga grupet kryesore që përfshihet në të drejtat e njeriut është dhe komuniteti i LGBTQ, dhe ne e dimë shumë mirë që në çdo raport të Bashkimit Europian përsa i përket shtetit shqiptar e gjen gjithmonë në shkelje përsa i përket respektimit të të drejtave të këtij komuniteti.
Dhe në kuadër të këtyre raporteve që vijnë nga Bashkimi Europian, qeveria shqiptare, që do të jetë si ai nxënës i mirë që do të bëjë detyrat sa më mirë që të bëhet pjesë e Bashkimit Europian, ka miratuar këtë urdhër dhe atë udhëzim më mbrapa, që ka të bëjë me trajtimin me hormone për personat që i përkasin këtij komuniteti”, tha ai ndër të tjera.
