Turistët nuk po lejohen të futen në një nga atraksionet më të njohura të Stambollit, Çisterna e Bazilikës, pasi një vendim gjykate ia transferoi kontrollin e vendit historik Drejtorisë së Përgjithshme të Fondacioneve, duke ia hequr administratës së qytetit të udhëhequr nga opozita, sipas mediave lokale.
Vendimi do të thotë se vendi tani operohet nga Drejtoria e Përgjithshme e Fondacioneve, e cila është nën varësinë e Ministrisë së Kulturës dhe Turizmit, e qeverisur nga partia në pushtet AKP, raportoi të martën agjencia shtetërore e lajmeve Anadolu.
Më parë, cisterna — e njohur në Turqi si Yerebatan Sarnici — drejtohej nga administrata e qytetit të Stambollit e udhëhequr nga opozita.
Sipas mediave lokale, zona u pastrua ndërsa ishte ende e hapur për publikun, që do të thotë se turistët që mbërritën i gjetën dyert të mbyllura. Mbetet e paqartë se kur do të rihapet vendi, i cili është i njohur si për vizitorët vendas ashtu edhe për ata ndërkombëtarë.
Aktualisht janë duke u zhvilluar procedura penale kundër shumë anëtarëve të stafit dhe kryetarit të shkarkuar të administratës së qytetit të Stambollit. Opozita thotë se është viktimë e një fushate të motivuar politikisht nga qeveria e Presidentit Rexhep Tajip Erdogan.
Çisterna e Bazilikës, e njohur edhe si “Pallati i Fundosur”, u ndërtua në shekullin e 6-të nën Perandorin Justinian si rezervuar uji për Pallatin e Madh. Pas pushtimit osman të Stambollit, çisterna shërbeu gjithashtu për të furnizuar me ujë Pallatin Topkapi aty pranë.
Në vitin 2022, administrata e qytetit të Stambollit e rinovoi cisternën dhe e pajisi atë me një instalim modern ndriçimi. Akin theksoi se 11 milionë njerëz e kishin vizituar cisternën që nga rinovimi dhe se ishte futur një çmim hyrjeje me zbritje të madhe për vizitorët vendas. Vendimi i gjykatës është pritur me kritika të ashpra.
Shpesh është paraqitur si një vend xhirimi filmash dramatikë, veçanërisht në filmin e James Bond “Nga Rusia me dashuri”. Çisterna e Bazilikës ndodhet në Sultanahmet, qendra historike e Stambollit, në afërsi të Shën Sofisë.
