Ekspertët e shëndetësisë kanë ngritur shqetësime lidhur me rrezikun e përhapjes së fruthit gjatë Kampionatit Botëror 2026, i cili po zhvillohet në Shtetet e Bashkuara të Amerikës, Meksikë dhe Kanada. Sipas paralajmërimeve të specialistëve, grumbullimi i qindra mijëra tifozëve nga vende të ndryshme të botës mund të rrisë mundësinë e transmetimit të sëmundjeve ngjitëse, me fruthin që konsiderohet kërcënimi kryesor.
Mjekët u kanë bërë thirrje tifozëve që planifikojnë të udhëtojnë drejt vendeve organizatore të sigurohen se janë të vaksinuar plotësisht kundër fruthit, duke theksuar se virusi përhapet lehtësisht në ambiente të mbushura me njerëz, si stadiumet, aeroportet dhe zonat e tifozëve.
Botërori 2026 është edicioni më i madh në histori, me pjesëmarrjen e 48 kombëtareve dhe me ndeshje të zhvilluara në tri shtete të Amerikës së Veriut. Fluksi i madh i udhëtarëve dhe lëvizja ndërkombëtare e tifozëve ka shtyrë autoritetet shëndetësore të monitorojnë nga afër situatën epidemiologjike gjatë turneut.
Ekspertët theksojnë se vaksinimi mbetet mbrojtja më efektive kundër fruthit dhe rekomandojnë që tifozët të kontrollojnë statusin e tyre të imunizimit para se të nisin udhëtimin drejt vendeve pritëse të Kupës së Botës.
