Kreu i Partisë Agrare Ambientaliste Agron Duka mendon që protestat e fundit qytetare e kanë vendosur në pozitë të vështirë qeverinë, ndonëse u shpreh skeptik për produktin e tyre final, për shkak të mungesës së organizimit.
Duke folur në një studio televizive , Duka theksoi po ashtu se në këto protesta ka zemërim popullor dhe nuk janë protesta me agjendë si ato që ka organizuar PD-ja.
“Është e vështirë të ketë një produkt përfundimtar nëse janë kaq kakofoni, me grupe të ndryshme njerëzish dhe të paorganizuar. Nëse duan të kenë produkt, duhet të organizohen dhe të zgjedhin një grup njerëzish, dhe s’ka asgjë të keqe të mbështesin politikanë të rinj kundër establishmentit”, u shpreh Duka.
“Bënë shumë mirë, sepse e vënë në pozitë të vështirë qeverinë. Ajo që unë e kam thënë gjithmonë, protestat me axhendë siç i bënte PD-ja s’kanë vlerë, realisht tregon që s’ka vlerë. Protestat bëhen kur ka një zemërim popullor siç ndodhi, për shumë e shumë arsye, duke filluar për Zvërnecin dhe më pas siç ata vetë kanë prononcuar, kanë nxjerrë shumë probleme që ka qeveria sot. Sepse ka indinjatë të madhe, të rrish 16 ditë në rrugë”, vijoi kreu i PAA-së.
