Këngëtarja shqiptare me famë botërore, Dua Lipa, është shprehur kundër një projekti të planifikuar luksoz në një zonë të mbrojtur natyrore në Shqipëri, i cili lidhet me dhëndrin e presidentit amerikan Donald Trump.
Në podcastin “Service95 Book Club”, 30-vjeçarja tha se e konsideron “shqetësuese” kur një qeveri “mund të ndryshojë thjesht një ligj për të anashkaluar kërkesat për mbrojtjen e mjedisit.”
Dua Lipa, prindërit e së cilës janë nga Kosova, shprehu gjithashtu mbështetjen për protestuesit që kundërshtojnë projektin.
“Më frymëzon shumë të shoh se sa shumë u intereson njerëzve kjo çështje,” tha ajo, duke shtuar se ekonomia e vendit duhet të ndërtohet “në mënyrë që t’u shërbejë njerëzve.”
Protestat kanë shpërthyer për shkak të planeve për ndërtimin e një hoteli luksoz në zonën e mbrojtur të Zvërnecit, në bregdetin jugperëndimor të Shqipërisë. Projekti lidhet me vajzën e presidentit amerikan, Ivanka Trump, dhe bashkëshortin e saj, Jared Kushner.
Projekti u prezantua për herë të parë në vitin 2024, ndërsa protestat nisën në fund të muajit maj, pasi në plazhet e Zvërnecit u panë tela me gjemba dhe buldozerë, duke nxitur reagime të forta nga banorët dhe aktivistët mjedisorë.
