Nicholas Brandram, 44 vjeç, nipi i Princeshës Katerina të Greqisë dhe Danimarkës, është gjetur i vdekur në shtëpinë e tij në Chiswick, në perëndim të Londrës.
Policia Metropolitane bëri të ditur se Brandram u gjet pa ndjenja në banesën e tij mbrëmjen e së martës, 15 shtator. Policia dhe Shërbimi i Ambulancës së Londrës mbërritën në vendngjarje rreth orës 19:12, por 44-vjeçari u shpall i vdekur.
“Të afërmit e tij janë informuar. Në këtë fazë, vdekja e tij po trajtohet si e papritur, por nuk ka rrethana të dyshimta”, deklaroi Policia Metropolitane.
Emri i Brandram nuk ishte bërë publik më herët, ndërsa autoritetet po hetonin rrethanat e vdekjes së tij. Pas vdekjes, policia lejoi që identiteti i tij të bëhej publik.
Brandram ishte përfshirë në hetimin e një prej rasteve më të bujshme të viteve të fundit në Londër, të njohur si “Putney Pusher”.
Në maj të vitit 2017, kamerat e sigurisë në Urën Putney regjistruan një burrë që po vraponte dhe që shtyu një grua në trotuar, pikërisht në momentin kur po afrohej një autobus. Shoferi reagoi në kohë dhe arriti ta shmangte gruan, e cila i shpëtoi një përplasjeje të mundshme me autobusin.
Pamjet u bënë virale në Britani dhe autori i panjohur u pagëzua nga mediat me nofkën “Putney Pusher”.
Pavarësisht viteve të hetimeve, identiteti i personit që shfaqej në pamjet e kamerave nuk ishte përcaktuar përfundimisht. Brandram u hetua si i dyshuar në këtë çështje.
Hetimi fillestar u mbyll në vitin 2018, pasi nuk u ngrit asnjë akuzë ndaj ndonjë personi. Megjithatë, informacione të reja çuan në arrestimin e Brandram këtë verë. Vetëm javën e kaluar, detektivët njoftuan se ai ishte liruar me kusht, ndërsa hetimet vijonin.
Nicholas Brandram ishte djali i Paul Brandram, fëmija i vetëm i Princeshës Katerina të Greqisë dhe Danimarkës dhe Major Richard Campbell Andrew Brandram, i cili shërbeu në Ushtrinë Britanike gjatë Luftës së Dytë Botërore.
Princesha Katerina, e lindur më 4 maj 1913, ishte stërmbesë e Mbretëreshës Viktoria dhe kushërirë e parë e Princit Filip. Ajo ishte fëmija i gjashtë dhe vajza e tretë e Mbretit Konstandin I të Greqisë dhe Sofisë së Prusisë, si dhe motër e tre mbretërve të Greqisë dhe një mbretëreshe të Rumanisë.
Pas pushtimit gjerman të Greqisë në vitin 1941, Katerina u largua nga vendi së bashku me vëllanë e saj Palin dhe gruan e tij, Frederikën. Ajo kaloi fillimisht në Kretë, më pas në Egjipt dhe Afrikën e Jugut, ku punoi si infermiere në një spital në Kejptaun.
Pas Luftës së Dytë Botërore, ajo u kthye në Angli dhe në vitin 1947 u martua me Major Richard Brandram, një ish-lojtar regbie. Çifti ishte takuar në anijen HMS Askania, gjatë kthimit nga Aleksandria drejt Anglisë.
Edhe Nicholas Brandram ndoqi një karrierë në botën e financave. Ai punoi në kompaninë e ndërmjetësimit Killik & Co dhe në bankën izraelite Bank Leumi, përpara se të kalonte në HSBC, ku merrej me menaxhimin e pasurive të individëve të pasur.
Përveç karrierës në sektorin financiar, Brandram kishte shërbyer edhe si kapiten në Ushtrinë Britanike, me misione në Irak, Bosnjë dhe Afganistan.
