Drejtoria a Burgjeve ka reaguar lidhur me transferimin e Erion Veliajt nga ambientet e paraburgimit, duke sqaruar se lëvizja drejt Institucionit të Ekzekutimit të Vendimeve Penale (IEVP) Fier është kryer në kuadër të masave të marra për sigurinë dhe mbarëvajtjen e institucioneve penitenciare.
Përmes një njoftimi për shtyp, institucioni thekson se pas mbërritjes në Fier, Veliajt i janë zbatuar procedurat standarde të pranimit, në përputhje me legjislacionin në fuqi për të drejtat dhe trajtimin e të paraburgosurve.
Sipas njoftimit, më 28 tetor 2026, Veliaj është vendosur në seksionin e pranimit dhe observimit, ndërsa një ditë më pas, më 29 tetor, strukturat përgjegjëse të burgut kanë zhvilluar një takim me të, ku janë dëgjuar pretendimet e tij dhe i janë dhënë sqarime mbi të drejtat dhe detyrimet gjatë qëndrimit në institucion.
Në përfundim të kësaj procedure, komisioni i pranimit ka vijuar me sistemimin e plotë të tij, bazuar në vlerësimin individual dhe procedurat përkatëse.
Një nga pikat kryesore të reagimit lidhet me urdhrin e transferimit, për të cilin Ministria e Drejtësisë sqaron se është miratuar sipas procedurave standarde, por bën pjesë në listën e dokumenteve të klasifikuara si “sekret shtetëror”.
Për këtë arsye, administrimi dhe vënia në dispozicion e dokumentit i nënshtrohen kritereve dhe procedurave të përcaktuara nga ligji për informacionin e klasifikuar.
Institucioni bën të ditur gjithashtu se për transferimin e Veliajt është njoftuar edhe organi i prokurorisë, në përputhje me legjislacionin në fuqi.
Në reagim citohet edhe kuadri ligjor që përcakton kompetencat e Drejtorit të Përgjithshëm të Burgjeve për nxjerrjen e urdhrave të transferimit, kur ekzistojnë arsye të përligjura. Sipas Ministrisë, vlerësimi dhe vendimmarrja për këto raste janë pjesë e kompetencës dhe diskrecionit administrativ të këtij autoriteti, mbi bazën e dokumentacionit të administruar dhe brenda kritereve ligjore.
Për të argumentuar se transferimet janë pjesë e praktikës së zakonshme të punës, në njoftim thuhet se nga Drejtoria e Përgjithshme e Burgjeve, gjatë periudhës 16–27 tetor 2026, janë kryer gjithsej 24 transferime në përputhje me kuadrin ligjor.
Reagimi i plotë:
Nisur nga spekulimet e shumta mediatike, vendosëm të bëjmë këtë njoftim të pazakontë për shtyp lidhur me procedura standarde të brendshme të punës.
Transferimi i shtetasit E.V është kryer në kuadër të masave që Drejtoria e Përgjithshme e Burgjeve ka marrë së fundmi për sigurinë dhe garantimin e mbarëvajtjes së institucioneve të ekzekutimit të vendimeve penale.
Në vijim të transferimit e të paraburgosurit E. V. në IEVP Fier, janë zbatuar procedurat e pranimit të parashikuara në nenin 38 të ligjit nr. 81/2020, datë 25.6.2020, “Për të drejtat dhe trajtimin e të dënuarve me burgim dhe të paraburgosurve”, si dhe në nenin 15 të Rregullores së Përgjithshme të Burgjeve, miratuar me vendimin nr. 209, datë 06.04.2022, të Këshillit të Ministrave.
Në zbatim të nenit 15, pika 4, të Rregullores së Përgjithshme të Burgjeve, më datë 28.10.2026 i paraburgosuri E.V u vendos në seksionin e pranimit (observimit) dhe u trajtua korrektësisht dhe në përputhje me kuadrin ligjor si për të gjitha rastet e tjera.
Më datë 29.10.2026, strukturat përgjegjëse të IEVP Fier kanë zhvilluar takim me të paraburgosurin E.V në ambientet e sektorit të observimit. Gjatë takimit janë dëgjuar pretendimet e tij dhe janë dhënë sqarime mbi të drejtat dhe detyrimet mbi qëndrimin në institucion. Në përfundim, komisioni i pranimit ka vijuar me sistemimin e tij të plotë, në përputhje me vlerësimin individual dhe procedurat përkatëse.
Sa i përket urdhrit të transferimit, për të cilin spekulohet posaçërisht në media, ky akt është miratuar në përputhje me procedurat standarde dhe përfshihet në listën e dokumenteve të klasifikuara “sekret shtetëror”. Për rrjedhojë, administrimi, njohja dhe vënia në dispozicion e tij u nënshtrohen kushteve, kritereve dhe procedurave të parashikuara në ligjin nr. 10/2023, “Për informacionin e klasifikuar”, dhe në aktet nënligjore të nxjerra në zbatim të tij.
Shtojmë se në rastin e të paraburgosurit E. V., është kryer edhe njoftimi i organit të prokurorisë, në përputhje me kërkesat e legjislacionit në fuqi.
Në mbështetje të nenit 78 të ligjit nr. 81/2020, “Për të drejtat dhe trajtimin e të dënuarve me burgim dhe të paraburgosurve”, si dhe të neneve 106–108 të Rregullores së Përgjithshme të Burgjeve, miratuar me vendimin nr. 209, datë 6.4.2022, të Këshillit të Ministrave, urdhri i transferimit për çdo arsye të përligjur nxirret nga Drejtori i Përgjithshëm i Burgjeve. Vlerësimi dhe vendimmarrja për transferimin përfshihen në kompetencën dhe diskrecionin administrativ të Drejtorit të Përgjithshëm, si praktikë normale pune e ushtruar brenda kushteve dhe kritereve ligjore, mbi bazën e dokumentacionit të administruar.
Nga DPB prej datës 16.10.2026 deri më datë 27.10.2026 janë kryer 24 (njëzet e katër) transferime brenda kuadrit ligjor.
Drejtoria e Përgjithshme e Burgjeve vijon të marrë masat e nevojshme për garantimin e sigurisë, parandalimin e ngjarjeve dhe mbarëvajtjen e institucioneve, duke respektuar të drejtat dhe dinjitetin e personave të burgosur.
