Një 41-vjeçar është arrestuar nga Policia, pasi tentoi të hynte ilegalisht në Shqipëri me një shumë të konsiderueshme parash, pa i deklaruar në Pikën Kufitare të Kakavijës, ndërkohë që ishte i shpallur në kërkim për vjedhje.
Arben Shehu, rezident në Greqi, u kap në afërsi të një karburanti, në PK Kakavijë, në tentativë për të kaluar ilegalisht kufirin për të hyrë në Shqipëri me 160 mijë euro.
Gjatë kontrollit fizik të ushtruar ndaj 41-vjeçarit shërbimet e Policisë gjetën në çantën e shpinës, disa zarfe brenda të cilave kishte 160 000 euro, që tentonte t’i fuste në Shqipëri, pa i deklaruar në PKK dhe që më pas iu sekuestruan.
Gjithashtu, si rezultat i verfikimeve të kryera, Shehu rezultonte i shpallur në kërkim, pasi Gjykata e Tiranës e ka dënuar me 1 muaj burgim për veprën penale “Vjedhja”. Në vijim të veprimeve procedurale të kryera nga ana e DVP Tiranë, u bë ndalimi i tij.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
