Portali i njohur amerikan ‘Politico’ ka publikuar një shkrim në lidhje me marrjen e shtetësisë shqiptare nga ish-kryebashkiaku i Nju Jorkut, Eric Adams. Portali e quan një aventurë që ngre disa pikëpyetje
“Një njësi e vogël administrative në kryeqytetin e Shqipërisë ka mirëpritur banorin e saj më të ri: ish-kryetarin e Bashkisë së Nju Jorkut, Eric Adams, i cili tashmë është bërë edhe qytetar i plotë shqiptar. Por mbetet një pyetje thelbësore: pse?
Adams bëri bujë ndërkombëtare kur mori shtetësinë shqiptare, por tani ka shkuar një hap më tej, duke u regjistruar zyrtarisht si banor në lagjen e tij të re dhe duke dhënë shenjat e gishtërinjve dhe foton për kartën e identitetit dhe pasaportën shqiptare.
Florian Pullazi, kreu i Njësisë Administrative nr. 2, ku Adams tashmë figuron zyrtarisht si banor, nuk konfirmoi për Politico nëse ai do të jetojë realisht në Tiranë apo cilat janë motivet e tij për marrjen e shtetësisë dhe pasaportës. Megjithatë, ai theksoi se marrja e shtetësisë nga Adams pasqyron “lidhjet e gjata dhe të thella mes qytetit të Nju Jorkut dhe komunitetit shqiptar në SHBA”.
Në një postim në rrjetet sociale, Florian Pullazi e përshkroi ish-kryebashkiakun Eric Adams si një “mik të madh të shqiptarëve”, një “politikan të njohur për përqendrimin në çështjet publike” dhe “ish-kapiten i Departamentit të Policisë së Nju Jorkut”.
Pasaporta shqiptare, e renditur e 43-ta në botë në vitin 2025 sipas Henley Passport Index, u jep mbajtësve të saj akses pa vizë ose me vizë në mbërritje në 123 vende. Edhe pse Shqipëria nuk është pjesë e Bashkimit Europian, pasaporta shqiptare lejon hyrje në zonën Shengena për deri në 90 ditë.
Sa i përket përfitimeve brenda vendit, Adams do të mund të jetojë dhe punojë në Shqipëri, të votojë, të blejë tokë bujqësore, të përdorë shërbimin shëndetësor dhe madje të kandidojë në zgjedhje lokale ose kombëtare.
Në fakt, në Shqipëri kanë qarkulluar spekulime se Adams mund të kandidojë për kryetar bashkie të Tiranës, pasi kryebashkiaku aktual Erion Veliaj ndodhet në burg prej më shumë se një viti, përballë akuzave për korrupsion dhe abuzime financiare.
Megjithatë, një person pranë Adams, që foli në kushte anonimiteti, tha se kjo nuk është e vërtetë. Sipas tij, nuk ka pasur asnjë diskutim që Adams të kandidojë për një post publik në Shqipëri dhe se ai po merr shtetësinë për arsye biznesi lokale.
“Mendoj se ai ka opsione më të mira, le ta themi kështu,” tha burimi, duke iu referuar postit të kryetarit të bashkisë së Tiranës.
Edhe Alisa Roever, ish-modele dhe mike e Adams, e cila drejton një organizatë bamirëse me vëllain e tij, u shpreh se nuk ka asnjë mundësi që ai të kandidojë për post publik në Shqipëri. “Plotësisht jashtë diskutimit,” tha ajo.
Disa persona të tjerë besojnë se ky hap lidhet me interesa biznesi dhe me “marrëdhëniet e forta” që Adams ka në vend.
Vetë Politico nuk mori përgjigje nga Adams për kërkesën për koment.
Eric Adams u largua nga detyra në fund të vitit 2025 pas një mandati të vetëm, i cili u shoqërua nga skandale korrupsioni, disa prej të cilave lidhen me marrëdhënie ndërkombëtare.
Aktakuza ndaj tij në shtator 2024 e akuzonte se kishte bërë favore politike për operativë të qeverisë turke në këmbim të ryshfeteve, si bileta avioni me çmime shumë të ulëta dhe qëndrime falas në hotele luksoze. Kjo çështje u rrëzua më pas nga Departamenti i Drejtësisë nën administratën e Donald Trump, si pjesë e një marrëveshjeje që gjyqtari e cilësoi si diçka që “i ngjan një pazari” mes Trump dhe ish-kryebashkiakut.
Adams pranoi pasaportën shqiptare dhe tha: “E dua të qenit amerikan, por sot, falë kryeministrit tuaj, jam edhe shqiptar.”
Ai e vizitoi për herë të parë Shqipërinë në tetor 2025, kur ishte ende kryebashkiak dhe nën presionin e pasojave politike nga skandali i korrupsionit.
Vizita e tij e shpejtë shkaktoi habi, sidomos kur u takua me kryeministrin Edi Rama, i cili gjithashtu përballet me akuza për korrupsion nga opozita vendase.
Gjatë vizitës, të dy diskutuan për zhvillimin e turizmit dhe biznesit mes dy vendeve, si dhe për krijimin e një linje direkte fluturimi me Nju Jorkun.
Ish-kryebashkiaku foli me tone pozitive për Tiranën, duke e quajtur një “qytet dhe komunitet në zhvillim që po ecën në drejtimin e duhur”.
“Doja të vija këtu për të mësuar më shumë për teknologjinë dhe për mënyrën se si ky kryeministër ka arritur të drejtojë transformimin e këtij vendi dhe qyteti,” u shpreh ai.
Megjithëse fluturimi direkt mes dy qyteteve ende nuk është realizuar, Adams duket se e ka çuar mbështetjen e tij për Shqipërinë në një nivel tjetër.
Më 10 prill u njoftua se, me një dekret të veçantë nga Bajram Begaj, ish-kryebashkiakut të Nju Jorkut, Eric Adams, iu dha shtetësia shqiptare.
Zakonisht, shtetësia shqiptare jepet përmes lidhjeve familjare ose pas disa viteve qëndrimi të rregullt në vend, si dhe pasi kalohen provimet për gjuhën dhe historinë. Por në raste të veçanta, shtetësia mund të jepet me procedurë të përshpejtuar për kontribute të rëndësishme në fusha si shkenca, ekonomia ose – si në rastin e këngëtares me famë botërore me origjinë kosovare, Dua Lipa në vitin 2022 – kultura.
POLITICO nuk ka arritur të konfirmojë kushtet mbi të cilat Adams e ka marrë shtetësinë me dekret të veçantë dhe çfarë kontributesh ka bërë ose do të bëjë ai për vendin.
Sa i përket lagjes së tij të re, Njësia Administrative Nr. 2 karakterizohet nga pallate pesëkatëshe të periudhës komuniste, një treg fshatar, një shkollë baleti dhe një treg rrobash të përdorura. Banorë të njohur përfshijnë disa ish-kryeministra dhe ish-presidentë, sopranon e njohur ndërkombëtarisht Inva Mula, dhe tani edhe Adams.
Vetëm disa orë pasi dha të dhënat biometrike në zyrën bashkiake, Adams u shfaq në Samitin e Diasporës në Tiranë, me një grafik të madh të flamurit shqiptar pas tij dhe me një plis të bardhë tradicional në kokë. Aty, mes duartrokitjeve të publikut, atij iu dorëzua pasaporta nga kryeministri Edi Rama.
“Shqiptarët do të thoshin: e dija që do të ndodhte kjo, por në fakt askush nuk e priste ta shihte realisht, që ish-kryetari i bashkisë së Nju Jorkut të bëhej qytetar i Tiranës dhe i Shqipërisë”, tha Rama para të pranishmëve.
Adams e pranoi pasaportën dhe shtoi: “Më pëlqen të jem amerikan, por sot, falë kryeministrit tuaj, jam shqiptar”, thuhet në artikullin e medies së njohur amerikane.
