Harry Kane ka vetëm një vit të mbetur në kontratën e tij me Bayern Munichun, dhe shumë shpejt do të duhet të vendosë nëse do të kërkojë një tjetër sfidë të madhe në fund të karrierës së tij.
Kane, i cili do të mbushë 33 vjeç pas Botërorit në SHBA, Kanada dhe Meksikë, mund të marrë shembull nga ish-ylli i Bayernit, Robert Lewandowski, i cili u transferua te Barcelona në vitin 2022 dhe vazhdon të luajë në nivel të lartë edhe në moshë të avancuar.
Sipas mediave spanjolle, Barcelona dhe trajneri i saj Hansi Flick kanë prioritet transferimin e një sulmuesi qendror në merkaton e verës.
Gazeta “Mundo Deportivo” raporton se klubi katalanas po shqyrton tre opsione kryesore: João Pedro i Chelseat, Julián Álvarez i Atlético Madridit dhe kapiteni i Anglisë, Harry Kane.
Raportohet se transferimi i Kane është shumë i vështirë për shkak të formës së tij të shkëlqyer te Bayerni dhe kontratës që zgjat deri në vitin 2027, por ai nuk e ka rinovuar ende marrëveshjen.
Në Gjermani, Kane ka qenë në formë të jashtëzakonshme, duke shënuar 98 gola në 94 ndeshje të Bundesliga dhe 36 gola vetëm në sezonin e fundit.
Ai ka fituar dy tituj radhazi të Bundesligës (2024–25 dhe 2025–26) dhe është përfshirë në formacionin më të mirë të sezonit për tre vite me radhë.
Pas finales së DFB-Pokal, ndeshja e radhës për kapitenin e Anglisë do të jetë me kombëtaren e tij kundër Kroacisë në hapjen e grupit në Botëror.
