Me Aeroportin e Vlorës në kalendat greke, një kompani greke duket se ka gjetur zgjidhjen. Hellenic Seaplanes njoftoi nisjen e dy linjave fluturimi me hidroplan, që do të lidhin qytetin e Janinës me Vlorën dhe Pogradecin.
Iniciativa vjen pas një ftese zyrtare nga autoritetet shqiptare dhe është pjesë e një kuadri më të gjerë bashkëpunimi për zhvillimin e infrastrukturës së hidroplanëve dhe korridoreve të reja të transportit ndërkufitar.
Qëllimi i saj është të lidhë qytetet bregdetare, rajonet ishujore dhe destinacionet turistike në të gjithë Mesdheun.
Fluturimet për në Vlorë dhe Pogradec janë hapi i parë praktik drejt zbatimit të një plani që aspiron ta bëjë Greqinë një qendër ekspertize dhe operacionesh për rrjetet e hidroplanëve në rajonin më të gjerë.
Duke zhvilluar tashmë një rrjet të gjerë aerodromesh ujore të licencuara në Greqi, Hellenic Seaplanes po kalon tani drejt zgjerimit ndërkombëtar të aktiviteteve të saj, me qëllim krijimin e një sistemi të ri transporti që përdor mjedisin detar si një infrastrukturë natyrore për lëvizshmëri.
Sipas planifikimit strategjik të kompanisë, lidhja greko-shqiptare është vetëm fillimi. Hapat e mëtejshëm përfshijnë zhvillimin e një rrjeti më të gjerë që do të mbulojë vendet e Adriatikut, Jonit, Mesdheut Lindor dhe Afrikës së Veriut, duke forcuar lidhjen, turizmin dhe bashkëpunimin ekonomik midis këtyre rajoneve.
