Lumenj llave derdhën nga një çarje që u hap në një lartësi prej 3,000 metrash mbi nivelin e detit. Mali Etna vullkani më i madh aktiv në Evropë, ka hyrë në një fazë të re aktiviteti intensiv vullkanik, duke ofruar edhe një herë një spektakël shumë mbresëlënës dhe magjepsës. Pamjet e reja të bëra nga droni kapin madhështinë e natyrës, ndërsa llava e ndritshme portokalli derdhet nga shpatet e vullkanit, duke “ndriçuar” qiellin e natës së Siçilisë.
Sipas të dhënave zyrtare nga Observatori i Etnës i Institutit Italian të Gjeofizikës dhe Vullkanologjisë (INGV), aktiviteti i fundit shpërthyes filloi nga një çarje që u hap në një lartësi prej rreth 3,000 metrash mbi nivelin e detit.
Vetëm brenda 24 orësh, rrjedha e dendur e llavës kishte rënë me shpejtësi më shumë se 300 metra poshtë pikës fillestare të shpërthimit. Imazhet e substancës së zjarrtë që rrjedh poshtë shpateve kanë qarkulluar në internet, duke tërhequr vëmendjen e njerëzve në mbarë botën.
Pavarësisht pamjes mbresëlënëse, shkencëtarët e INGV po e monitorojnë nga afër fenomenin. Deri më tani, Observatori ka regjistruar aktivitet relativisht të dobët shpërthyes, pa formimin alarmues të reve të mëdha të hirit vullkanik.
Megjithatë, duke ndjekur protokollet ndërkombëtare të sigurisë, niveli i alarmit të aviacionit (sipas kodit të ngjyrave të Organizatës Ndërkombëtare të Aviacionit Civil – ICAO) është vendosur dhe mbetet në portokalli . Kjo sinjalizon ose një mundësi në rritje të një shpërthimi më të madh ose se shpërthimi aktual po përparon me emetim të kufizuar ose pa emetim të hirit, gjë që mund të ndikojë në fluturimet në zonën e Katanias.
Nga ana e saj, Agjencia Italiane e Mbrojtjes Civile e mban nivelin e alarmit për popullsinë në të verdhë . Ekspertët sigurojnë se këto shpërthime vullkanike zakonisht nuk paraqesin një rrezik të menjëhershëm dhe nuk shkaktojnë ndikime serioze tek banorët e zonave përreth.
