Shtatëdhjetë e katër vjet pasi avioni Pan Am Flight 526A, i njohur si “Easter Special”, u rrëzua në det pranë Porto Rikos, një nga historitë më prekëse të asaj tragjedie është rikthyer në vëmendje pas zbulimit të rrënojave të avionit në fund të Oqeanit Atlantik.
Pak çaste pas rrëzimit, një mjek që ndodhej në një anije shpëtimi pa mbi dallgë një çantë gruaje. Kur e hapi, brenda gjeti një pudër fytyre dhe një letër të shkruar me dorë. Edhe pse e lagur nga uji i detit, letra ishte ende e lexueshme.
Ajo ishte dërguar nga një ushtar i ri portorikan, i stacionuar në Massachusetts, për bashkëshorten e tij të sapomartuar, Gloria Rosario, e cila po udhëtonte drejt Nju Jorkut për t’u ribashkuar me të.
“Nuk mund ta imagjinosh sa shumë më ke lumturuar kur më the se do të vish në Nju Jork. Jam njeriu më i lumtur në Tokë”, shkruante ai. Në fund të letrës, ushtari i lutej Virgjëreshës Mari ta mbronte gjatë fluturimit dhe e qetësonte me një fjali që sot tingëllon rrëqethëse:
“Mos ki frikë nga avioni. Nuk do të ndodhë asgjë.” Pak më vonë, mjeku pa emrin e Gloria Rosarios në listën e të mbijetuarve në një spital. Ajo ishte një nga vetëm 17 personat që shpëtuan, ndërsa 52 të tjerë humbën jetën.
Ai iu afrua dhe i tha: “Zonjushë, gjeta çantën tuaj me letrën e burrit. Ai duhet të jetë shumë i shqetësuar. Kur pashë emrin tuaj në spital, vendosa t’i njoftoj se jeni gjallë dhe mirë.”
Gloria u përgjigj me qetësi:“Oh, i shkreti. Ai është njeri shumë i mirë. Ka shumë besim.”
Kur mjeku e pyeti për aksidentin, ajo dha një përgjigje që mbeti në kujtesë:“Më shumë njerëz duhej të ishin shpëtuar.”
Për dekada me radhë, rrënojat e avionit u konsideruan të humbura. Vetëm muajin e kaluar, një ekip kërkimi i specializuar i zbuloi ato rreth 600 metra nën sipërfaqen e Atlantikut, vetëm pak milje larg bregut verior të Porto Rikos.
Zbulimi i avionit “Clipper Endeavor” ka rikthyer në dritë jo vetëm një nga tragjeditë e hershme të aviacionit civil, por edhe histori njerëzore si ajo e letrës së një burri që i premtoi gruas së tij se fluturimi do të ishte i sigurt – një premtim që fati e përgënjeshtroi vetëm pak minuta më vonë.
