Neymar do të transferohet te Inter Miami në janar, kur t’i skadojë kontrata me Santosin.
Këtë e ka bërë të ditur ish-përfaqësuesi brazilian Felipe Melo.
Kontrata e 34-vjeçarit me klubin që e nxori në skenë do të skadojë në dhjetor, muaj gjatë të cilit vetë Neymar e kishte lënë të hapur edhe mundësinë e tërheqjes nga futbolli i luajtur.
Megjithatë, sipas asaj që deklaroi Melo në kanalin e tij në YouTube, ylli brazilian është gati të udhëtojë drejt Shteteve të Bashkuara për t’u ribashkuar me ish-shokët e tij të Barcelonës, Lionel Messi dhe Luis Suárez, duke nisur nga fillimi i vitit të ardhshëm.
“Një mik ma ka konfirmuar: do të jetë sërish MSN”.
Një marrëveshje e mundshme do ta rikompozonte treshen historike “MSN”, e cila shënoi plot 363 gola në tri sezone në Kataluni, përpara transferimit rekord të Neymarit te Paris Saint-Germain për 222 milionë euro.
Vetëm në sezonin e tyre të parë së bashku, tre kampionët i realizuan plot 122 gola, duke e udhëhequr Barcelonën drejt triumfit në Champions League.
“Një mik më ka zbuluar se Neymar do të shkojë të luajë në Miami në janar. Nëse kjo ndodh, do të kem qenë i pari që e ka dhënë këtë lajm”, deklaroi ish-mesfushori brazilian.
Nëse transferimi realizohet, Neymar do të ribashkohej me Lionel Messin dhe Luis Suárezin, duke e rikthyer njërën prej tresheve sulmuese më të famshme në historinë e futbollit.
