Një kontroll rutinë në portin e Pireut ka çuar në zbulimin e një rrjeti të dyshuar për trafik droge dhe pastrim parash, që dyshohet se vepronte përmes një kompanie pasurish të paluajtshme në ishullin grek të Rodosit. Ngjarja nisi mëngjesin e 27 gushtit, kur efektivët e njësive kundër drogës dhe të sigurisë së Autoritetit Qendror Portual të Pireut ndaluan një 62-vjeçar grek, i cili sapo kishte mbërritur me një anije pasagjerësh dhe mallrash nga Rodos.
Me ndihmën e një qeni të trajnuar për zbulimin e lëndëve narkotike, policia e mbajti nën vëzhgim 62-vjeçarin, i cili shkoi në zonën e bagazheve të pashoqëruara për të marrë një valixhe. Gjatë kontrollit, brenda saj u gjetën 35 gramë kokainë dhe 0.9 gramë kanabis, çka çoi në arrestimin e tij.
Hetuesit nisën menjëherë të gjurmonin burimin e lëndës narkotike dhe identifikuan si të dyshuar për dërgimin e saj një 45-vjeçar shqiptar, i cili punonte në një kompani pasurish të paluajtshme në Rodos. Pas zbulimit, autoritetet greke zhvilluan një operacion të gjerë në ishull, ku morën pjesë efektivë të njësive kundër drogës dhe kontrabandës, si dhe strukturat e sigurisë së Autoritetit Portual të Rodosit. Kontrolli u krye në prani të një prokurori dhe me ndihmën e qenit të specializuar K9 “SIRINA”. Gjatë kontrollit në ambientet e kompanisë së pasurive të paluajtshme, autoritetet sekuestruan 949,658.38 euro cash, për të cilat nuk u gjetën dokumente që justifikonin posedimin apo ruajtjen e ligjshme të shumës.
Përveç parave, në ambientet e kompanisë u gjetën edhe një numër i madh pajisjesh POS, karta nga institucione të ndryshme financiare, telefona celularë, karta SIM, pajisje dixhitale për ruajtjen e të dhënave, si dhe shënime të shkruara me dorë ku figuronin emra dhe shuma parash. Gjatë operacionit, 45-vjeçari shqiptar u lokalizua dhe u arrestua. Në posedim të tij u gjetën dhe sekuestruan edhe 3,750 euro. Sipas autoriteteve, shuma totale e parave të sekuestruara është depozituar në Fondin e Depozitave dhe Kredive.
Hetuesit po krahasojnë materialet e sekuestruara me dokumentacionin zyrtar të kompanisë, ndërsa dyshimet janë zgjeruar për një aktivitet më të gjerë kriminal, që përfshin pastrimin e parave dhe veprimtarinë e një organizate kriminale. Dy personat e arrestuar janë dërguar përpara organeve kompetente të drejtësisë. Ndërkohë, hetimi paraprak vijon nga Autoriteti Qendror Portual i Rodosit për veprat penale që lidhen me trafikun e drogës, pastrimin e parave dhe krijimin e një organizate kriminale.
