Kreu i Partisë Demokratike, Sali Berisha, deklaroi se opozita do të mbështesë me të gjithë forcën protestat në vend. Pas daljes nga SPAK, ku u paraqit në zbatim të masës së sigurisë “detyrim paraqitje”, ai e cilësoi revoltën si një shpërthim të shoqërisë shqiptare.
“Revolta është shpërthimi i Shqipërisë”, tha Berisha, ndërsa akuzoi Prokurorinë e Posaçme se është shndërruar në “një organizatë partie”. Sipas tij, ky institucion mund të kishte luajtur një rol të rëndësishëm në interes të shqiptarëve, duke pasur edhe mbështetjen e madhe ndërkombëtare.
Berisha iu përgjigj edhe deklaratës së kryeministrit Edi Rama, i cili e akuzoi se kërkon “një 21 janar të dytë”.
“Zjarrvënësi më i madh i historisë së kombit është padrino Edi Rama. Është ai që ka djegur dhe shkatërruar ëndrrat gjatë pushtetit të tij të rreth 720 mijë të rinjve shqiptarë”, u shpreh kreu i PD-së.
Duke u ndalur te kërkesa e SPAK për heqjen e imunitetit të Belinda Ballukut, Berisha akuzoi qeverinë dhe kryeministrin se po e mbrojnë ish-zëvendëskryeministren.
Ai drejtoi akuza edhe ndaj Altin Dumanit, të cilin e cilësoi si “armik të egër të pluralizmit politik dhe votës së lirë të shqiptarëve”. Berisha bëri të ditur se gjatë qëndrimit në ambientet e SPAK kishte lënë edhe një shënim drejtuar Dumanit, pa dhënë hollësi mbi përmbajtjen e tij.
