Aktorja e njohur për rolet në “Heroes” dhe “Nashville”, Hayden Panettiere, ka ndërruar jetë të dielën në moshën 36-vjeçare. Ajo u gjet pa shenja jete në një banesë nga një mik i saj, sipas njoftimeve të policisë. Shkaku zyrtar i vdekjes mbetet ende për t’u konfirmuar, megjithëse audioja e thirrjeve të urgjencës e publikuar nga TMZ sugjeron se autoritetet kanë diskutuar mundësinë e një mbidoze.
Vetëm tre muaj më parë, ish-partneri i saj, Brian Hickerson, dha një intervistë ku foli për marrëdhënien e tyre. Megjithatë, Hickerson pranoi se do të ishte “budalla” nëse nuk do të distancohej, duke shtuar se ata ndoshta nuk do të ishin të përshtatshëm për njëri-tjetrin, pasi ajo duhej të fokusohej në karrierën e saj.
Ai e përshkroi aktoren si “gjënë më të ëmbël në botë” dhe si një “vajzë të së dielës”.
Historia mes Panettiere dhe Hickerson ka qenë e trazuar, duke përfshirë periudhën nga viti 2018 deri në vitin 2020. Hickerson ishte dënuar më parë për dhunë në familje ndaj aktores. Pas një periudhe ndarjeje, dyshja u rikthyen bashkë në vitin 2021, ndërsa statusi i marrëdhënies së tyre në kohën e vdekjes së aktores mbetet i paqartë.
Mediat amerikane raportuan se ata ishin parë duke udhëtuar së bashku gjatë fundjavës.
Babai i aktores, Skip Panettiere, konfirmoi lajmin për vdekjen e saj, duke e përshkruar atë si një forcë të natyrës që solli gëzim për shumë njerëz. Kjo është humbja e dytë për familjen brenda tre vitesh, pasi vëllai i Hayden, Jansen, ndërroi jetë në vitin 2023 në moshën 28-vjeçare.
Pak javë para vdekjes, Panettiere anuloi pjesëmarrjen e saj në ngjarjen “Creep I.E. Con” në Ontario të Kalifornisë. Organizatorët njoftuan se aktorja, e njohur edhe për rolin e saj në filmin “Scream VI”, nuk mundi të merrte pjesë për shkak të një emergjence. Panettiere kishte folur më parë publikisht për sfidat me shëndetin mendor dhe varësinë, duke ndjekur trajtime rehabilituese.
