Tre persona janë vrarë dhe katër të tjerë janë plagosur gjatë një incidenti me të shtëna në një klub striptizmi që funksiononte jashtë orarit të lejuar në Detroit, Miçigan (SHBA), sipas policisë.
Oficerët që iu përgjigjën incidentit pak pas orës 07:20 me orën lokale të së dielës, mbërritën brenda katër minutash dhe gjetën tre persona që kishin marrë plagë vdekjeprurëse nga armët e zjarrit, deklaroi për gazetarët shefi i policisë së Detroitit, Todd Bettison, të dielën në mëngjes, shkruajnë mediat e huaja, përcjell Telegrafi.
Katër persona të tjerë – dy burra dhe dy gra të moshave 20 dhe 30-vjeçare – u dërguan në spitalet e zonës me plagë që nuk konsideroheshin kërcënuese për jetën.
Tre personat e vrarë, të cilët sipas policisë ishin të gjithë mbi moshën 30-vjeçare, ende nuk janë identifikuar.
Bettison tha se të shtënat pasuan një konflikt në klub, i cili ndodhet në një rrugë kryesisht rezidenciale.
“Ndodhi një përleshje, një konflikt, dhe si pasojë individët vendosën ta zgjidhnin atë përmes dhunës me armë zjarri”, ka thënë ai.
Policia nuk ka njoftuar për ndonjë arrestim, por Bettison tha se hetuesit kanë siguruar të dhëna dhe se nuk ka rrezik të vazhdueshëm për publikun.
Vendndodhja ishte tashmë e njohur për policinë, e cila kishte marrë shtatë telefonata në lidhje me këtë adresë që nga fillimi i vitit.
Bettison theksoi se për këtë adresë po zhvillohej gjithashtu një hetim.
Kryetarja e Këshillit Bashkiak të Detroitit, Mary Sheffield, tha se qyteti do të punojë për të luftuar aktivitetet e paligjshme që zhvillohen jashtë orarit të lejuar, pavarësisht nëse ato drejtohen nga shtëpi apo biznese.
Sheffield tha se autoritetet do të bëjnë “gjithçka që munden” për të parandaluar zhvillimin e aktiviteteve të tilla në komunitetet dhe lagjet e Detroitit.
