Pas përfundimit të protestës para Kryeministrisë, një grup qytetarësh vijuan marshimin në rrugët e Tiranës.
Protestuesit u drejtuan fillimisht pranë selisë së Partisë Socialiste, ku godina ishte e rrethuar nga forca të shumta policie.
Më pas, ata marshuan drejt zonës së njohur si “15-katëshi”, ku bllokuan për disa minuta kryqëzimin, duke shkaktuar ndërprerje të përkohshme të qarkullimit.
Më pas, protesta vijoi në zonën e Ushtarit të Panjohur, ku pjesëmarrësit u ulën simbolikisht në mes të rrugës për disa minuta, si shenjë kundërshtimi. Pas këtij aksioni simbolik, qytetarët u shpërndanë, duke i dhënë fund protestës së mbrëmjes.
