Pierre-Emerick Aubameyang (37) ka vendosur t’i japë fund përfundimisht karrierës së tij me kombëtaren. Sulmuesi më i mirë në historinë e Gabonit ka zhvilluar 84 ndeshje me kombëtaren dhe ka shënuar 40 gola.
Aubameyang ka lindur në Laval të Francës. Para se të luante në nivelin e të rriturve, ai ishte pjesë e ekipeve të moshave të Francës dhe Spanjës. Megjithatë, në vitin 2009 vendosi të përfaqësonte Gabonin.
Marrëdhënia e tij me kombëtaren ka qenë e tensionuar gjatë viteve të fundit. Për herë të parë ai u tërhoq nga kombëtarja në vitin 2022, por më pas u rikthye pas një ftese nga presidenti i atëhershëm Ali Bongo.
Pas Kupës së Kombeve të Afrikës 2025, ai u përjashtua përsëri nga kombëtarja, ndërsa më vonë iu lejua sërish rikthimi.
Tani Aubameyang ka vendosur ta mbyllë përfundimisht kapitullin e tij me kombëtaren.
“Më poshtëruan dhe ma shkatërruan reputacionin kur luajta në Kupën e Kombeve të Afrikës i dëmtuar. Kjo ishte pika që mbushi kupën dhe preferoj t’i lë gjërat me kaq. Mendoj se problemet e kombëtares janë shumë më të thella sesa roli i parëndësishëm që unë kam në gjithë këtë situatë”, deklaroi Aubameyang.
Gjatë karrierës së tij ai ka shënuar më shumë se 400 gola. Ai është gjithashtu golashënuesi më i mirë në historinë e Europa League, me 34 gola.
Për më tepër, Aubameyang është futbollisti afrikan me më shumë gola në pesë ligat më të forta të Evropës, me mbi 240 gola, si dhe golashënuesi më i mirë afrikan në historinë e Bundesligës.
