Lufta në Ukrainë po hyn në një fazë të re përshkallëzimi, pasi sulmet ruse ndaj infrastrukturës së Kievit kanë prekur edhe urat mbi lumin Dniepër, ndërsa presidenti ukrainas Volodymyr Zelensky paralajmëron se vendi i tij do t’u përgjigjet duke goditur infrastrukturën energjetike ruse.
Ura Veriore e Kievit u dëmtua gjatë një sulmi ajror rus, duke çuar në pezullimin e qarkullimit dhe duke shtuar vështirësitë e transportit mes dy brigjeve të Dnieprit. Sipas autoriteteve ukrainase, sulmi vjen pas goditjeve të mëparshme ndaj Urës Jugore dhe objekteve të tjera kritike të kryeqytetit.
Zelensky tha se Ukraina do të intensifikojë sulmet ndaj objekteve energjetike në Rusi, me rafineritë e naftës në fokus.
“Me sulmet e tyre ndaj energjisë sonë, ne duhet t’u përgjigjemi ndaj energjisë së tyre. Para së gjithash, rafinerive të naftës: asaj që u sjell atyre para për këtë luftë.”
Presidenti ukrainas theksoi gjithashtu se Kievi nuk synon të kopjojë mënyrën se si Rusia po zhvillon sulmet ndaj infrastrukturës civile.
“Por ne nuk do të përgjigjemi, sigurisht, si ata, duke goditur objekte civile.”
Zelensky e lidhi këtë qëndrim me atë që ai e përshkroi si një ndryshim të taktikave ruse përpara dimrit. Sipas tij, inteligjenca ukrainase ka siguruar dokumente që tregojnë për një politikë të re të Moskës ndaj objektivave infrastrukturore dhe civile, raporton Reuters.
Ndërkohë, kancelari gjerman Friedrich Merz mbërriti të dielën në Kiev në një vizitë të paparalajmëruar, i shoqëruar nga ministrja e Ekonomisë dhe Energjisë, Katherina Reiche, si dhe drejtues të kompanive gjermane të mbrojtjes. IInternazionale
“Sot erdha në Kiev sepse Ukraina ka nevojë për të gjithë mbështetjen tonë në javët e ardhshme”, deklaroi Merz pas mbërritjes.
Ai paralajmëroi gjithashtu se pasojat e luftës mund të shtrihen përtej Ukrainës.
“Nëse Rusia nuk ndalet, herët a vonë makina e saj e luftës do të kthehet kundër nesh”, tha ai.
Merz pritet të njoftojë një paketë të re mbështetjeje për Ukrainën, e cila, sipas zyrtarëve gjermanë, përfshin 1 miliard euro ndihmë ushtarake dhe 350 milionë euro për riparimin e infrastrukturës energjetike. Vizita pritet të shërbejë edhe për finalizimin e një marrëveshjeje për prodhimin e përbashkët të dronëve.
Në fokus është veçanërisht prodhimi i dronëve interceptues kundër mjeteve ajrore ruse me shpejtësi të lartë. Marrëveshjet mes kompanive gjermane dhe ukrainase parashikojnë gjithashtu zhvillimin e armëve me rreze mbi 1,000 kilometra. IInternazionale
Vizita e Merzit zhvillohet në një moment kur Moska ka paralajmëruar se do të vazhdojë sulmet që i quan hakmarrëse, ndërsa Kievi thotë se do të vazhdojë goditjet ndaj kapaciteteve energjetike ruse.
Të dyja palët mohojnë se synojnë qëllimisht civilët, por sulmet e ditëve të fundit kanë shkaktuar dëme të konsiderueshme në infrastrukturën e qyteteve dhe kanë rritur shqetësimet për furnizimin me energji gjatë dimrit.
