Muzikanti irlandez Glen Hansard, fitues i çmimit Oscar për Këngën më të Mirë Origjinale në vitin 2008 për filmin Once dhe këngëtari kryesor i grupit rock The Frames, ka humbur jetën në një aksident me motor në moshën 56-vjeçare, raportojnë mediat irlandeze.
Sipas policisë irlandeze, një burrë rreth të 50-ave humbi jetën pas një aksidenti ku u përfshi vetëm motori që ai drejtonte në perëndim të Dublinit.
Shërbimet e emergjencës mbërritën në vendngjarje pak para orës 04:30 sipas orës lokale. Pavarësisht ndihmës së parë të dhënë në vend, ai nuk mundi t’u mbijetonte plagëve të marra.
Radio Newstalk dhe gazeta Irish Independent raportuan se viktima ishte Glen Hansard, megjithëse deri më tani autoritetet nuk e kanë konfirmuar zyrtarisht identitetin e tij.
Ndërkohë, një zëdhënës i Hansard nuk iu përgjigj menjëherë kërkesës së agjencisë Reuters për koment.
Hansard ishte një nga emrat më të njohur të muzikës irlandeze. Ai fitoi famë ndërkombëtare me filmin Once, ku interpretoi së bashku me Markéta Irglová. Kënga e tyre “Falling Slowly” u vlerësua me çmimin Oscar për Këngën më të Mirë Origjinale në vitin 2008, duke e bërë Hansard një nga artistët më të vlerësuar të skenës muzikore irlandeze.
